Amerika va xitoylik paleontologlarning hamkorlikdagi tadqiqot guruhi Hitoyning sharqiy provintsiyasi Szyansuda taxminan 100 million yoshda bo‘lgan to‘rtta dinozavrning toshga aylangan izlarini topdi. Bu haqda “TASS” xabar berdi.
Qayd etilishicha, aniqlangan dinozavr izlari zauropodlar guruhi — Yer yuzida qachonlardir yashagan to‘rt oyoqli eng yirik o‘txo‘r dinozavrlar guruhiga mansub. Mutaxassislarning taxminicha, bu topilma hozirgi Xitoy hududida qanday dinozavrlar turi yashagani va ularning evolyutsiyasini o‘rganishda yordam beradi.
Tadqiqotda Xitoyning geofanlar universiteti, Kolorado universiteti va boshqa bir qator universitetlar paleontologlari ishtirok etgan.
Xabarda aytilishicha, hozirda olimlar kamyob topilma himoyasini ta’minlash maqsadida mahalliy hukumat bilan hamkorlik qilmoqda.
