SpaceX kompaniyasi o‘zining Starlink yuqori tezlikdagi global internet dasturi doirasida 24-may kuni 60 ta sun’iy yo‘ldosh ortilgan Falcon 9 raketa tashuvchisini uchirdi. Bu haqda Meduza xabar berdi.
SpaceX’ning Twitter’dagi sahifasida xabar berilishicha, barcha sun’iy yo‘ldoshlar muvafaqiyatli ishga tushirilgan. SpaceX asoschisi Ilon Mask kosmik qurilmalar internetga ulanganini ma’lum qilgan.
Falcon 9 raketasi orbitaga umumiy og‘irligi 18,5 tonna bo‘lgan yuk olib chiqdi. Bu ushbu raketa modeli ko‘targan eng og‘ir yukdir.
Kompaniya 2018-yilda Starlink dasturida ishtirok etuvchi ikkita sun’iy yo‘ldosh prototipini orbitaga chiqargan edi.
SpaceX orbitada sun’iy yo‘ldoshlar yordamida internet global qamrovi loyihalarini amalga oshiruvchi kompaniyalardan biridir. Bunday kompaniyalar qatoriga, shuningdek, OneWeb, Telesat, LeoSat va Amazon ham kiradi.
