Davlat xizmatlari agentligi avtoraqamlar berishning soddalashtirilgan taklifi bilan chiqdi
Adliya vazirligi huzuridagi Davlat xizmatlari agentligi avtoraqamlar berishning soddalashtirilgan va korrupsiyasiz mexanizmini taklif etmoqda. Hujjat loyihasi Normativ-huquqiy hujjatlar loyihasi muhokamasi saytiga joylashtirildi. Bu haqda “Daryo”ga Davlat xizmatlari agentligi matbuot xizmati xabar berdi.
Taklif etilayotgan loyihaga ko‘ra, avtomototransport vositalarini davlat ro‘yxatidan o‘tkazish va avtoraqam berish xizmati tajriba tariqasida Davlat xizmatlari markazlari orqali ko‘rsatiladi.
Bunda, markazlar orqali quyidagi toifadagi avtotransport vositalari ro‘yxatdan o‘tkazilishi rejalashtirilmoqda:
- O‘zbekistonda ishlab chiqilgan va xorijdan keltirilgan yangi avtomototransport vositalari;
- notarial oldi-sotdi shartnomasi asosida mulkdori o‘zgargan ikkilamchi avtotransport vositalari.
“Loyiha aholini qiynayotgan asosiy ikki muammo – byurokratiya va korrupsiyani istisno etishga qaratilganligi bilan ahamiyatlidir”, – deyiladi hujjatda.
Avtotransport vositasini davlat ro‘yxatidan o‘tkazishda avtotransport vositalarini ko‘zdan kechirish, texnik ko‘rikdan o‘tkazish talab etilmaydi. Shunigdek, xorijdan keltirilgan yangi avtotransport vositalari haqidagi ma’lumotlar (deklaratsiya hujjatlari) ham bojxona organlari tomonidan elektron tizimga kiritilib boriladi, ularni tizim orqali tekshirish imkoniyati yaratilgan.
Davlat xizmatlari markazlari avtotransport vositalarini davlat ro‘yxatidan o‘tkazishda maxsus elektron tizim orqali avtosalonlar tomonidan berilgan schyot–spravkalar hamda bojxona organlari tomonidan berilgan bojxona deklaratsiyasi ma’lumotlarga asoslangan holda avtotransport vositasini ko‘zdan kechirmasdan ro‘yxatdan o‘tkazadi.
Ikkilamchi bozordagi avtotransport vositalari
Ularni ham qayta rasmiylashtirishda– texnik yoki boshqa tarzdagi ko‘riklardan o‘tkazish talab etilmaydi. Eski avtotransportlar notariuslar tomonidan boshqa shaxs nomiga oldi-sotdi shartnomalari asosida o‘tkazilgunga qadar shundoq ham ichki ishlar organlari tomonidan agregatlar raqamlari ro‘yxatdan o‘tkazish raqamlariga muvofiqligi yuzasidan ko‘zdan kechiriladi. Notarius ichki ishlar organinining ushbu ma’lumotnomasiga asoslangan holda oldi-sotdi shartnomalarini tasdiqlaydi.
Davlat xizmatlari markazlari ikkilamchi bozordagi avtotransportni–notarial shartnomani elektron tizimdan tekshirgan holda hech qanday ko‘rikdan o‘tkazmagan holda amalga oshiradi.
Avtoraqamlar sotishda korrupsiyaga chek qo‘yish haqida
Endilikda avtoraqamlar korrupsiyaning oldini olish maqsadida maxsus elektron tizim orqali inson omilining aralashuvisiz to‘liq avtomatik tarzda tanlash orqali taqdim etiladi. Har bir ro‘yxatdan o‘tkazilgan raqamlar Markaz binosidagi yirik interaktiv ekranda ochiq ko‘rinishda aks ettiriladi va real vaqt rejimida yangilanib boriladi.
Xuddi shuningdek, auksion orqali beriladigan avtoraqamlar toifasiga kirmaydigan ayrim xaridorgir raqamlarni (jumladan, “ko‘zgu” shaklidagi, masalan 212, 313, 717 va hokazo) orttirilgan stavkada taqdim etish nazarda tutilmoqda. Bunda ham korrupsion xavfni nol darajagacha kamaytirish maqsadida ushbu toifadagi raqamlar ham qo‘shimcha to‘lov evaziga avtomatik tarzda elektron tizim orqali tanlash yo‘li bilan amalga oshiriladi.
Fuqaro xaridorgir raqam uchun eng kam oylik ish haqining 1 baravari miqdoridagi qo‘shimcha to‘lov amalga oshirsa, unga 1X1 – 9X9 toifadagi ko‘zgusimon raqamlardan (jami 72 ta) biri inson omilining aralashuvisiz elektron tizim orqali tanlab beriladi.
