Lancet jurnalida chop etilgan “Global Burden of Disease” tadqiqotida odamlar o‘tgan asrning o‘rtalariga nisbatan umr davomiyligi 22 yoshga oshgani ma’lum qilindi, deb yozadi “Kaktakto”.
Tadqiqotchilar 1950-yildan 2017-yilgacha erkaklar umr ko‘rish davomiyligi 48 yoshdan 70,5 yoshgacha, ayollarniki esa 53 yoshdan 76 yoshga oshgan, degan xulosaga kelgan.
Markaziy Osiyo mamlakatlari orasida O‘zbekiston aholisi eng uzoq umr ko‘ruvchi deb topilgan bo‘lib, u 73,8 yoshni tashkil etadi.
Tojikistonda bu ko‘rsatkich 73,7 yosh, Qozog‘istonda esa 72,4 yosh deb topilgan. Qirg‘iziston va Turkmaniston aholisida esa umr davomiyligi bundan ham kamroq — 70,9 va 70,4.
Dunyo bo‘yicha esa eng uzoq umr ko‘ruvchi Gonkong (84,3), Yaponiya (83,8) va Italiya (83,5) aholisi hisoblanadi. Germaniyada o‘rtacha umr davomiyligi 80,6 yoshni, AQShda 78,6 yoshni, Xitoyda esa 76,2 yoshni tashkil etadi.
Turkiyada odamlar o‘rtacha 75,7 yil yashaydi, Rossiyada esa 71,5 yil.
Mongoliya aholisi eng qisqa umr ko‘ruvchi deb topilgan bo‘lib, u yerda bu ko‘rsatkich 69,2 yoshni tashkil etgan.
Izoh (0)