“Yandeks” serial ishlab chiqarish bilan shug‘ullanmoqchi

Rossiyaning “Yandeks” internet-kompaniyasi original serial ishlab chiqarishni boshlaydi. Bu haqda Meduza xabar berdi.

Internet-kompaniya hozirda kinostudiyalar bilan faol muzokaralar olib bormoqda va ularga sakkiztadan o‘ntagacha teledastur buyurtma qilish niyatida.  Birinchi loyihalar 2020-yil boshlarida namoyish etiladi.

Hozirda ikkita loyiha bo‘yicha yakuniy kelishuvlarga erishilgan. Ularning birinchisi “Sreda” telekompaniyasining “Vazirlik” seriali. Unga Roman Volobuyev rejissorlik qilgan. Serial amaldorlar va korrupsiya muammolariga bag‘ishlangan. Ikkinchi serial esa Mars Media kompaniyasining “Vodoprovod” detektiv seriali. Andrey Stempkovskiy tomonidan suratga olinmoqda.

“Yandeks” kompaniyasi ushbu loyihani “Kinopoisk” bazasida o‘z onlayn kinoteatrini rivojlantirish hamda pullik abonentlar sonini ko‘paytirish uchun amalga oshirmoqda, deyiladi xabarda.