Donald Tramp GM rahbariyatini Ogayodagi zavodni yopmaslikka chaqirdi

AQSh prezidenti General Motors (GM) avtomobilsozlik kompaniyasidan zavodini yopayotgan Ogayo shtatiga qaytishni talab qildi, deb xabar berdi “RBK”.

Avvalroq GM xarajatlarni kamaytirish maqsadida Shimoliy Amerikada, jumladan AQSh va Kanadadagi 5 ta zavodini yopishi va 14 ming ishchini qisqartirishini e’lon qilgandi.

“Davlatimiz General Motors’ga ko‘p yaxshilik qilgan. Ular Ogayoga tezroq qaytsa yaxshi bo‘lardi. Biz ularga katta bosim ko‘rsatmoqdamiz”, — deydi Tramp.

Trampning ta’kidlashicha, GM zavodlarini yopishida muayyan modellar yomon sotilayotganini sabab qilib ko‘rsatgan.

AQSh prezidenti GM rahbariyatini uning talabini bajarmasa, ularni katta muammolar kutayotganini ham aytib o‘tgan.