Joriy yilning 21-noyabr kuni Buxoro davlat universitetida Yaponiyaning Vakayama universiteti, O‘zbekiston Vazirlar Mahkamasi huzuridagi “El-yurt umidi” jamg‘armasi hamda O‘zbek-yapon markazi hamkorligida “BuxDU-Vakayama turizm ta’limi va tadqiqotlari markazi” ochilishi marosimi bo‘lib o‘tdi. Bu haqda viloyat hokimligi matbuot xizmati ma’lum qildi.
BuxDU va Vakayama universiteti o‘rtasidagi hamkorlik aloqalari joriy yilning 16-aprel kuni imzolangan o‘zaro shartnoma doirasida olib borilmoqda.
Vakayama universiteti Turizm fakulteti o‘z bakalavriat dasturlari uchun Butunjahon turizm tashkiloti UNWTO’ning TedQual sertifikatini qo‘lga kiritgan bo‘lib, turizm yo‘nalishida bunday sertifikatga ega bo‘lgan birinchi va yagona yapon universitetidir. Fakultet huzurida “Turizm tadqiqotlari markazi” faoliyat ko‘rsatadi. Ayni paytgacha mazkur universitetdan BuxDUga bir necha marotaba professor-o‘qituvchilar ilmiy ma’ruzalar o‘qish uchun tashrif buyurgan.
“BuxDU-Vakayama turizm ta’limi va tadqiqotlari markazi”ning asosiy vazifalari o‘zaro hamkorlikda turizm sohasida tadqiqotlar olib borish bilan bir qatorda yangi o‘quv adabiyotlari tayyorlash, ilmiy-uslubiy yo‘nalishlarda qo‘shma loyihalar, bakalavriat va magistraturada qo‘shma o‘quv dasturlarini amalga oshirishdir.
Markaz faoliyatini qo‘llab-quvvatlashda Vazirlar Mahkamasi huzuridagi “El-yurt umidi” jamg‘armasi hamda O‘zbek-yapon markazining Buxoro filiali yaqindan ko‘mak beradi. “El-yurt umidi” jamg‘armasi Yaponiyadan professor-o‘qituvchi va tadqiqotchilarni taklif qilish, BuxDU vakillarini Vakayama va boshqa yetakchi yapon universitetlariga malaka oshirishga yuborish, zamonaviy o‘quv adabiyotlari bilan ta’minlashda yordam ko‘rsatadi. O‘zbek-yapon markazi Buxoro filiali turizm uchun yapon tili va madaniyati kurslarini tashkil etadi.
Markaz ixtiyoriga ajratilgan xonalar BuxDU ishtirok etgan Yevropa Komissiyasining Tempus va Erasmus+ dasturlari doirasida ta’lim sifatini oshirish maqsadida olib kelingan eng zamonaviy texnik jihozlar bilan ta’minlangan.
Markazda yaqin oylar ichida 10 dan ortiq darslik va qo‘llanmalar hamkorlikda tayyorlanishi, BuxDU va Vakayama universiteti “Turizm” bakalavriat va magistratura ta’lim yo‘nalishlari o‘quv dasturlari asosida yagona dastur ishlab chiqilishi, 2019—2020 o‘quv yilidan boshlab, mazkur dastur asosida talabalar qabul qilinishi rejalashtirilgan. Mazkur masalalar 2019-yilning mart oyida BuxDU delegatsiyasining Yaponiyaga tashrifi doirasida yakuniga yetkaziladi.
Izoh (0)