Yangi Zelandiyada bojxonada telefonni ko‘rsatishdan bosh tortganlik uchun jarima joriy qilindi

Yangi Zelandiya hukumati bojxonachilarga o‘z telefonini ko‘zdan kechirishga qo‘ymaydigan sayyohlarni 3200 dollar miqdorida jarima to‘lashga majbur qildi. Bu haqda “Korrepondent.net” xabar berdi.

Qayd etilishicha, mamlakatga kirish bo‘yicha yangi qoidalar joriy haftada kuchga kirgan. Ularga ko‘ra, mas’ul shaxslar mamlakatga keluvchilardan telefonni ko‘zdan kechirish uchun uni blokdan chiqarishni talab qilish huquqiga ega. Agar sayyoh buni rad qilsa, telefon olib qo‘yilishi va hatto musodara qilinishi mumkin.

Yangi Zelandiya rasmiylari bunday yangi qoidalar zarurat sababli joriy qilinganini ta’kidlamoqda, chunki ayni paytda taqiqlangan ma’lumotlar asosan elektron shaklda saqlanadi va tashiladi.

O‘z navbatida, mahalliy huquq himoyachilari yangi qabul qilingan qonunda shaxsiy hayotga dahlni ko‘rmoqda.