Moskvadagi 2015-yilda o‘ldirilgan siyosatchi Boris Nemsov yashagan uyda o‘rnatilgan xotira lavhasi 12-sentabr kuni olib tashlandi. Bu haqda Meduza xabar bermoqda.
SERB harakati faoli Gosha Tarasevich ijtimoiy tarmoqdagi sahifasida lavha noqonuniy o‘rnatilgani sababli politsiya bo‘limiga yetkazilganini ma’lum qildi.
Boris Nemsov yashagan Klimentov tor ko‘chasidagi uyga 7-sentabr kuni xonadon egalari qarori bilan xotira lavhasi o‘rnatilgandi. Moskva rasmiylari taniqli arboblar xotirasini abadiylashtirish to‘g‘risidagi tartibni buzganligi sababli bu harakatni noqonuniy deb topdi.
Bunga javoban Zamoskvorechye tumani deputati Sergey Markov lavha xonadon egalarining xususiy mulki ekanligi, shu sababli faqat sud qarori bilan olinishi mumkinligini bildirdi. Uyda yangi lavha o‘rnatilishi esa mazkur masala hal bo‘lmaguncha rejalashtirilmagan.
Ma’lumot uchun, SERB harakati 2014-yilda tashkil etilgan bo‘lib, muntazam ravishda muxolifat vakillariga qarshi hujum va aksiyalar uyushtirib keladi.
Izoh (0)