1990-yillar oxirida Kanadaning Galifaks shahrida yashovchi Stiv Morsxed noreply@eastlink.ca manzili bo‘yicha elektron pochta ochgan. O‘sha vaqtda ro‘yxatdan o‘tishda hech qanday muammo bo‘lmagan. Oradan 20 yil o‘tib kompaniya kanadalikka uning pochtasini olib qo‘yishini ma’lum qilgan, deb xabar berdi Meduza.
Stiv 7-iyun kuni o‘z pochtasining serveri saqlanadigan Eastlink kompaniyasidan xat olgan, unga ko‘ra Stivning barcha xatlari bir oy davomida o‘chirib tashlanadi. Xatda aytilishicha, bu kabi manzillar avvallari yangilik hisoblangan bo‘lsa, hozirda bu odamlarni chalg‘itishi mumkin. Hozirda noreply@xxxxx.yy ko‘rinishidagi manzillardan asosan ofis xizmatlari foydalanadi — ulardan servislar javob talab qilinmaydigan xabarlar, hisoblar va shu kabi boshqa narsalar yuboriladi.
Stiv Morsxed o‘zini haqoratga uchragan deb hisoblamoqda: agarda bu kabi manzillardan foydalanish xavfli ekanligi borasida 20 yil oldin ogohlantirilganida hozirgi vaziyatga tushib qolmagan bo‘lardi.
Kanadalikning so‘zlariga ko‘ra, u yigirma yil davomida o‘z elektron pochtasi manzilidan banklar, e’lonlar servislari, do‘konlar va boshqa yuzlab joylar uchun foydalangan. Bundan tashqari, ayni vaqtda u uyini sotmoqda va pochtaning o‘chirib yuborilishi o‘rinsiz.
“20 yil davomida pochtadan foydalandim, kompaniya vakillari butalar ichidan chiqib kelib menga 20 yil davomidagi yozishmalarim ichidan o‘zimga keraklilarini saqlab qolishim uchun 30 kun vaqt berishini aytishini nomaqbul hisoblayman”, — dedi Stiv Morsxed.
Foydalanuvchining so‘zlariga ko‘ra, kompaniya uning arxivini boshqa pochtaga o‘tkazib berishdan ham bosh tortgan. Eastlink’ning jurnalistlarga xabar berishicha, ular bu masalada Stivga yordam berishga tayyor.
Stiv Morsxedning so‘zlashicha, uning xotini Eastlink kompaniyasini rahbariga xat yozganidan keyin pochtani o‘chirish haqida xabar kelgan. Ular shu orqali hozirda keng tarqalgan noreply manzili kompaniyaga emas, balki foydalanuvchiga tegishli ekanligini bilib qolgan bo‘lishi mumkin.
Izoh (0)