AQShning Michigan shtati Sharqiy okrugi sudi Amerika hukumati mamlakatdan quvib chiqarmoqchi bo‘lgan iroqliklarning AQShdan deportatsiya qilinishiga vaqtinchalik taqiq kiritish haqida qaror chiqardi, deb yozadi “TASS”.
O‘tgan hafta sudya Mark Goldsmit joriy yilning 11-iyunida Detroit hududida politsiya tomonidan qo‘lga olingan 114 nafar iroqlikka nisbatan shunday qarorni qabul qilgan edi. Endi Goldsmit hukumat sudlanganligi uchun deportatsiya qilmoqchi bo‘lgan barcha Iroq fuqarolari va shtatlar uchun shunday taqiqni tarqatdi. Chora 14 kunga kiritiladi, bu vaqt ichida ushbu okrug sudi cheklanmagan muddatga shunday taqiqni joriy qilish uchun vakolati bor-yo‘qligi haqida yakuniy qaror qabul qilinadi.
Ushbu ish prezident Donald Trampning Eron, Liviya, Somali, Sudan, Suriya va Yaman fuqarolariga AQShga kirish uchun viza bermaslik haqidagi farmoniga aloqador. Iroqliklar AQShga qonuniy asosda kelgan, ammo hukumat ushbu muhojirlar avval sudlanganligi va qonunlarni buzganligini aniqladi. Shu munosabat bilan hukumat bu odamlarni qo‘lga olib, mamlakatdan deportatsiya qilmoqchi edi. Bunday chora-tadbirlar jami 1,4 ming iroqlikka nisbatan amalga oshirilishi rejalashtirilgan edi.
Izoh (0)