O‘zbekiston matbuot va axborot agentligi tomonidan bir qator vazirlik va tashkilotlar bilan hamkorlikda 25—27-may kunlari Qoraqalpog‘iston Respublikasi va barcha viloyatlar markazlari hamda Toshkent shahridagi G‘afur G‘ulom nomidagi madaniyat va istirohat bog‘ida an’anaviy “Kitob bayrami” o‘tkaziladi. Bu haqda “Daryo”ga agentlik mutasaddilari ma’lum qildi.
Sayl tarzida o‘tkaziladigan ma’naviy-ma’rifiy tadbir kun tartibidan kitoblar taqdimoti, noshir va mualliflar, kitob grafikasi rassomlari bilan ijodiy uchrashuvlar, mushoiralar va suhbatlar, sovrinli intellektual viktorinalar, shuningdek, “Kitobsevarlarni qutlaymiz!” nomli konsert dasturi o‘rin olgan.
26-may kuni “Kitob – millatning bebaho madaniy va ma’naviy merosi” mavzusidagi V ilmiy-amaliy konferensiya ham bo‘lib o‘tadi.
