Mahalliy mansabdorlarning 2007-yildagi qarori bilan Yaponiyaning Vakayama prefekturasi Kinokava shahridagi Kisi temir yo‘l bekati kuzatuvchisiga aylangan Tama laqabli mushuk omma orasida mashhurlikka erishgan. O‘z vazifasiga kirishishidan oldin hayvon uysiz bo‘lgan va o‘zining bo‘lajak ish joyida aylanib yurgan. Unga bekat xodimlari ovqat bergan, deb yozmoqda National Geographic.
Shu vaqtda Wakayama Electric Railway kompaniyasi moliyaviy inqirozni boshdan kechirayotgan va bankrotlik yoqasida turgan edi. Xususan, Kisi bekati xodimlari sonining qisqarishi xavfi bor edi. Kompaniya prezidenti Mitsunobu Kosimaning ma’lum qilishicha, Tamaning kuzatuvchi etib tayinlanishi dastlab uysiz hayvonni ko‘chaga haydamaslik maqsadida qilingan edi.
Tama xizmat kiyimida va furajkada bekatning kirish joyidagi maxsus budkada o‘tirgan. Dumli kuzatuvchi haqidagi xabar tez tarqalgan va Kisi bekatiga mahalliy va xorijiy sayyohlar oqib kela boshlagan. Natijada butun kompaniyaning moliyaviy holati yaxshilana boshlagan. Tama ishlagan yillar davomida mahalliy iqtisodiyotga 1,1 milliard iyena (qariyb 9 million dollar) daromad keltirgan. O‘z karyerasini oddiy kuzatuvchi sifatida boshlagan mushuk “ultrakuzatuvchi” lavozimiga yetgan. Keyin esa kompaniyaning vitse-prezidenti darajasiga ko‘tarilgan.
Tama 16 yoshida 2015-yil 22-iyunda vafot etgan. Faxriy kuzatuvchining dafn marosimi uchun Kisi bekatiga taxminan 3 ming kishi kelgan. Odamlar minnatdorlik va hurmat sifatida gullar va mushukning sevimli ovqati bo‘lgan konservalangan tunets balig‘i olib kelgan.
“Tama-san yo‘q joydan qutqaruvchi qahramon kabi paydo bo‘ldi. Men u bilan birga ishlashni faxr deb hisoblaganman”, — degan Mitsunobu Kosima dafn marosimida so‘zlagan so‘zida.
Tamaning tanasi bekat yonida joylashgan maxsus joyga qo‘yilgan.
“Daryo”ning Telegram’dagi rasmiy kanali — @toshqindaryo’ga a’zo bo‘ling!
Izoh (0)