Ayollar garderobining eng universal va qulay liboslaridan biri bu ko‘ylakdir (rubashka). Aynan bitta ko‘ylakni turli usullarda kiyish va istalgan kiyim bilan uyg‘unlashtirish mumkinligini bilasizmi?
Klassik ko‘ylakni xilma-xil variantlarda kiyish mumkin. Tugmalari ochib qo‘yilgan ko‘ylak bilan uning ostidan mayka yoki futbolka kiyish ham qiziqarli uslub hisoblanadi. Shuningdek, uning uchlarini tugib, djinsi yoki yubkalar bilan kiyish mumkin.
Uni pastki qismi torayib boruvchi yubka (qalam-yubka) bilan uyg‘unlashtirib, ofis uniformasini hosil qilish ham mumkin.
Keng bichimdagi yubkalarning yana urfga qaytishi bilan oq ko‘ylak bunday yubka bilan ajoyib uyg‘unlik hosil qilishi ma’lum bo‘ldi. Shuningdek, uni maksi uzunlikdagi yubkalar bilan ham kiyish mumkin. Bu variant oqshomgi hashamdor obraz yaratishda qo‘l keladi.
Garderobingiz uchun asos bo‘luvchi kiyimlar haqidagi qoidalardan biri oq ko‘ylakni djinsi va ingichka poshnali tufli (shpilka) bilan uyg‘unlashtirib bashang obraz yaratishni tavsiya etadi.
Oq ko‘ylak, shuningdek, klassik shimlar bilan ham xushbichim obraz yaratadi. Obrazingizni lodochka yoki erkaklar uslubidagi botinkalar bilan to‘ldiring.
Shuni unutmangki, oq ko‘ylak deyarli har qanday uslubdagi obrazni yaratish imkonini beradi. Eng murakkab bichim va dizayndagi kiyim uchun ideal fon bo‘la oladi. Garderobingizdagi yorqin qizil yubka yoki yashil djinsi anchadan buyon kiyilmaydimi? Ulardan qutulishga shoshilmang — oq ko‘ylak tufayli ularni hayotga qaytarish mumkin.
Izoh (0)