Yaponiyada xodimlari haddan ko‘p ishlab vafot etgan kompaniyalar omma oldida sharmanda qilinadi

Yaponiya sog‘liqni saqlash, mehnat va ijtimoiy ko‘mak vazirligi xodimning ko‘p ishlab holdan toyish natijasida yoki ishlab chiqarishdagi baxtsiz hodisa tufayli vafot etishi bilan bog‘liq birgina holat ham isbot etilgan kompaniyalar nomlarini ommaga e’lon qilishga va’da berdi, deb yozadi “Vedomosti”.

Ushbu chora mamlakatdagi eng yirik Dentsu reklama agentligi atrofidagi shov-shuvga javob bo‘ldi. Agentlikning 24 yoshli xodimasi 2015-yilning dekabrida o‘z joniga qasd qildi, keyinroq uni ish vaqtidan tashqari ishlashga majbur qilishgani va u haftasiga 40 soatlik me’yor bo‘lgan holda, oyiga 105 soat ortiqcha ishlagani ma’lum bo‘ldi. Dentsu’ga qarshi tergov boshlandi. Yaponiya hukumati agentlikka nisbatan mos choralar ko‘rilishiga va’da berdi.

Agar kompaniyada bunday qonunbuzarlik aniqlansa, uning rahbarlari dastlab vazirlikka chaqiriladi va mehnat qonunchiligi haqida eslatiladi. So‘ng kompaniyaga inspeksiya jo‘natiladi. Agar ular xodimlar uchun sharoit o‘zgarmaganini ko‘rsa, kompaniyadagi qoidabuzarliklar haqida vazirlikning o‘zi ommaga e’lon qiladi.