Braziliya futbol federatsiyasi Kolumbiyadagi aviahalokat munosabati bilan 7 kunlik motam e’lon qildi

Braziliya futbol federatsiyasi Kolumbiyadagi aviahalokat munosabati bilan mamlakat chempionatining so‘nggi tur uchrashuvlarini 11-dekabrga qoldirdi. Bu haqda federatsiya matbuot xizmatiga tayanib, “TASS” xabar bermoqda.

Boliviyadan Kolumbiyaning Medelin shahriga uchayotgan Lamia samolyoti 29-noyabrga o‘tar kechasi La-Unyon shahri yaqinida halokatga uchradi. Havo kemasi bortida 72 yo‘lovchi hamda 9 nafar ekipaj a’zosi bo‘lgan. Samolyot ichida futbol bo‘yicha Braziliya A seriyasida harakat qilayotgan “Shapekoense” klubining 27 futbolchisi bo‘lgani ham xabar qilingandi.

“‘Shapekoense’ klubining mudhish hodisa munosabati bilan Braziliya futbol federatsiyasi yetti kunlik rasmiy motam e’lon qilib, ushbu kunlarga belgilangan uchrashuvlarning qoldirilishi haqida ma’lum qiladi”, – deyiladi xabarda.

Braziliya chempionatining 38-tur uchrashuvlari, Braziliya Kubogi o‘yini hamda yoshlar o‘rtasidagi Braziliya Kubogi final bellashuvi qoldiriladi.

• Kolumbiyada halokatga uchragan samolyotdan futbol bo‘yicha Argentina termasi avval foydalangani ma’lum bo‘ldi

“Shapekoense” futbolchilari 1-dekabr kuni Kopa Sudamerikano – Janubiy Amerika mintaqasi klublari o‘rtasidagi Kopa Libertadores turniridan keyin nufuzi jihatdan ikkinchi o‘rinda turadigan musobaqasi doirasida “Atletiko Nasyonal” klubiga qarshi maydonga tushishi kerak bo‘lgan.

So‘nggi ma’lumotlarga ko‘ra, Kolumbiyadagi aviahalokat oqibatida qurbon bo‘lganlar soni 75 kishiga yetdi. Braziliyada aviahalokat munosabati bilan uch kunlik motam e’lon qilindi.

• Kolumbiyadagi aviahalokatda O‘zbekiston milliy termasi a’zosi Aziz Haydarovga murabbiylik qilgan shaxs ham bo‘lgan

Janubiy Amerika konfederatsiyasi (KONMEBOL) o‘z bayrog‘i ostidagi xalqaro turnirlar o‘tkazilishini ma’lum muddatga to‘xtatib qo‘ydi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.