Sankt-Peterburgning “Zenit” jamoasi hujumchisi Artyom Dzyuba va darvozabon Yuriy Lodigin “Krasnodar”ga qarshi (1:2) Rossiya chempionati 15-tur o‘yinidan keyin kiyinish xonasida mushtlashib ketdi. Bu haqda “Chempionat”ga tayanib, Meduza xabar bermoqda.

“Zenit” klubi ushbu voqeani tasdiqlamadi. Sharhlovchi Konstantin Genichdan Twitter orqali futbolchilar o‘rtasida mojaro bo‘lgan-bo‘lmagani haqidagi savol so‘ralganida, u “Bo‘lishi mumkin” deya javob qaytardi.

O‘yinning 86-daqiqasida Artyom Dzyuba hisobni ochib, “Zenit”ni oldinga olib chiqqan bo‘lsa, hakam tomonidan asosiy vaqtga qo‘shib berilgan daqiqaning birinchisida Marat Izmaylov hisobni tenglashtirdi. Uchrashuvning so‘nggi soniyalarida Tornike Okriashvili akrobatik uslubdagi goli bilan “Krasnodar”ga 3 ochko taqdim qildi.

“Krasnodar”ning birinchi goli kiritilgan vaziyatda “Zenit” himoyachisi Domeniko Krishito xatoga yo‘l qo‘ydi, ikkinchi golda esa piterliklar posboni Yuriy Lodigin havodan uchib kelayotgan to‘pni jarima maydonchasida muvaffaqiyatli chiqara olmadi.

“Sports.ru”ning qayd etishicha, “Krasnodar” ikkinchi golni urganidan keyin Artyom Dzyuba jamoadoshlariga qarab qo‘li bilan nomaqbul xatti-harakatlarni amalga oshirdi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.