AQSh mudofaa vaziri Mosulni ozod etish operatsiyasi borishini baholash uchun Iroqqa keldi

AQSh mudofaa vaziri Eshton Karter kurd ko‘ngillilarining Mosulni ozod etishdagi ishtirokini o‘rganish uchun Iroqning Irbil shahriga keldi. Bu haqda “RBK” xabar bermoqda. 

Karter kurdlar yetakchisi Mas’ud Barzoniy, shuningdek, jangovar harakatlar borishi bilan tanish AQSh harbiylari bilan uchrashdi. Barzoniy uchrashuv chog‘ida kurd otryadlari Mosuldan 24 kilometr shimoli-sharqda joylagan Bashik shahri qo‘lga olinganini ma’lum qildi.

Muloqot davomida Mosulni ozod etish bo‘yicha operatsiya boshlanganidan beri kurdlar 25 kishini yo‘qotgani bildirildi. Karter bunga javoban “Ular jon-jahdi bilan kurashmoqda, biroq shiddatli janglar ketayotgani sababli yo‘qotishlar ham bo‘lmoqda” deya ta’kidladi. 

Karter IShID jangarilarini Rakkada taslim etish bo‘yicha operatsiya “imkon boricha tezroq” boshlanishini ko‘rish niyatida ekanligini qayd etib o‘tdi. Pentagon rahbariga ko‘ra, Rakkadagi operatsiya chog‘ida AQSh suriyalik isyonchilar harakatini muvofiqlashtirib boradi.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.