Ramzan Qodirov Yemelyanenkoning qiziga hujum qilganlarni qattiq jazolashga chaqirdi
Checheniston rahbari Ramzan Qodirov Rossiya Aralash janglar san’ati (MMA) ittifoqi prezidenti Fyodor Yemelyanenkoning 16 yoshli qiziga hujum qilganlarni qattiq jazolash kerakligini aytdi, deb xabar bermoqda “TASS”.
“Bu g‘azablantiradigan hodisa va uni yaxshilab surishtirish, aybdorlarni esa qonun bo‘yicha qattiq jazolash kerak. Aybdorlarni nafaqat qizga qo‘l ko‘targani, balki millatlar orasida sovuqchilik olib kelish xatti-harakati uchun ham jazolash kerak”, – dedi Qodirov.
“Kim bo‘lishidan qat’i nazar, qiz bolaga qo‘l ko‘targanni inson, erkak deb bo‘lmaydi. Bu yerda faqatgina jismoniy zarar yetkazish, og‘riq berish yoki tunab ketish maqsadi qo‘yilmagan. Katta ehtimol bilan, jamoatchilikda rezonans keltirib chiqarish ko‘zlangan. Qiz bolaga qo‘l ko‘targanlar uning kim ekanini bilgan”, – deya qo‘shimcha qildi Qodirov.
“Aybdorni qanday bo‘lmasin topish kerak. Qidiruvga barcha kuch va imkoniyatlarni ishga solish lozim. Moskvada kuzatuv kameralari har bir kvadrat metrni kuzatadi. Demak, aybdorlarni topsa bo‘ladi va topish kerak. Biz ham bu yo‘nalishda ishlayapmiz va imkon qadar yordam berishga tayyormiz”, – dedi Qodirov.
Eslatib o‘tamiz, Moskva shahrida sobiq MMA jangchisi Fyodor Yemelyanenkoning 16 yoshli qizi Mariyaga hujum qilinishi oqibatida u shifoxonaga yotqizilgan. Mazkur holat yuzasidan jinoiy ish ochilgani, keyinroq Mariya shifoxonadan chiqqani haqida xabar berilgandi.
Shundan so‘ng, Rossiya prezidenti Vladimir Putinga Yemelyanenkoning qiziga hujum uyushtirilgani ma’lum qilingani haqida xabar berildi.
Qayd etish joiz, Fyodor Yemelyanenko 4-oktabr kuni Grozniy shahrida o‘tkazilgan Grand Prix Akhmat 2016 aralash janglar turnirida yosh bolalar ishtirokini tanqid qilgandi. Keyinroq “Axmat” klubi prezidenti Abuzayd Vismuradov Rossiya MMA rahbarining ushbu masala yuzasidan tanqid qilishga haqqi yo‘q ekanini aytgandi. Shuningdek, Checheniston rahbari Ramzan Qodirov Yemelyanenkoning tanqidiga o‘z munosabatini bildirgan edi.
Yemelyanenkoning qiziga uyushtirilgan hujum otasining faoliyatiga, xususan, bolalar jangini tanqid qilishga bog‘liq ekani tasdiqlanmadi.
