Oliy Ligada so‘nggi o‘rinda borayotgan “Andijon” klubi futbolchilari paxta terish uchun paxta dalasiga olib chiqildi
“Andijon” futbol klubi viloyatning Izboskan tumanidagi paxta dalasida paxta tergani haqida klub matbuot xizmatiga tayanib, “Chempionat.asia” xabar berdi.
O‘zbekiston milliy terma jamoasining JCh—2018 yo‘lidagi o‘yinlari sabab Oliy Ligada kichik tanaffus yuzaga kelgandi. Bundan foydalangan “Andijon” klubining futbolchilari, jamoa rahbariyati, ayollar va bolalar jamoalarining murabbiylari paxta yig‘im-terimida ishtirok etdi.
Bepoyon dalada klub rahbariyati, futbolchilar va ishchi xodimlar yonma-yon mehnat qilib, yurtimizning paxta xirmoniga o‘z ulushlarini qo‘shishdi, deb yozdi jamoa matbuot xizmati. Xabarda, shuningdek, jamoaning bir qator a’zolari hayoti davomida birinchi bor paxta dalasida ko‘rinish bergani keltirib o‘tilgan. Yakunda esa natija chakki bo‘lmagani aytilgan.
Klubning Oliy Ligadagi natijasi esa chakki bo‘lib, jamoa 16 klub ishtirok etadigan ligada so‘nggi o‘rinni egallab turibdi.
