Avstraliyada OITS epidemiyasiga chek qo‘yilgani ma’lum qilindi

Avstraliyada OITS epidemiyasi oxiriga yetdi, 2020-yilga kelib esa mamlakat OIV yuqtirish holatlariga deyarli to‘liq barham berishi mumkin. Bu haqda 17-iyulda Durbanda (JAR) ochiladigan OITS bo‘yicha XXI xalqaro anjuman arafasida chop etilgan byulletenda ma’lum qilindi, deya xabar beradi Science News.

Hozirda Avstraliyada har yili mingga yaqin OIV yuqtirgan bemorlar aniqlanadi. Bu esa, Jahon sog‘liqni saqlash tashkiloti (JSST)ga ko‘ra, mamlakatda infeksiya epidemiyasi to‘xtaganini bildiruvchi ko‘rsatkich. Shifokorlarning bildirishicha, OIV yuqtirishning kamayishi virusga qarshi samarali terapiya bilan birgalikda Avstraliyada 2020-yilga kelib OITSdan o‘lim holatlariga chek qo‘yilishiga olib keladi.

Bunday muvaffaqiyatlarni tadqiqotchilar profilaktika choralari va virusga qarshi samarali terapiya bilan bog‘lamoqda. Birinchi yo‘nalish xavf guruhlariga kiruvchilar bilan ishlash, shuningdek, maktab, o‘quv yurtlari va tibbiyot muassasalarida maxsus ta’lim dasturlari kiritilishini o‘z ichiga oladi. Ikkinchisi esa o‘z vaqtida qo‘llanadigan zamonaviy virusga qarshi terapiyadan iborat.