Qirg‘izistonda huquq-tartibot organlarining katta islohoti tayyorlanmoqda

Qirg‘izistonda huquq-tartibot organlarining katta islohoti tayyorlanmoqda. Bu haqda mamlakat Mudofaa kengashi kotibi Temir Jumaqodirov ma’lum qildi, deb xabar bermoqda “RIA Novosti”.

4-iyul, dushanba kuni Bishkek shahrida Qirg‘iziston prezidenti ishtirokida Mudofaa kengashining majlisi bo‘lib o‘tdi. Unda huquq-tartibot va migratsiya nazorati choralarini isloh qilish masalalari ko‘rib chiqildi. Majlis matbuot uchun yopiq rejimda o‘tkazildi.

Temir Jumaqodirovning aytishicha, islohot birinchi navbatda mamlakat prokuraturasiga ta’sir qiladi va ushbu organdan surishtiruv ishlari vazifasi olib tashlanadi, jinoiy ish qo‘zg‘atish funksiyasi esa saqlanib qoladi. Surishtiruv ishlari vazifasi Qirg‘iziston milliy xavfsizlik qo‘mitasi va Iqtisodiy jinoyatga qarshi kurashish davlat xizmatiga o‘tadi.