Zlatan Ibragimovich Shvetsiya termasi safidagi ishtirokini yakunlashi haqidagi xabarlarni rad etdi
Futbol bo‘yicha Shvetsiya terma jamoasi sardori, hujumchi Zlatan Ibragimovich mamlakat terma jamoasi safidagi ishtirokini yakunlashi haqidagi xabarlarni rad etdi. Bu haqda 34 yoshli futbolchi Yevro–2016 turniriga tayyorgarlik doirasida o‘tkazilgan matbuot anjumanida ma’lum qildi, deb xabar bermoqda “TASS”.
“Bu masala yuzasidan kuch ketkazmadim va hech kim bilan muhokama qilmadim. Bu yerga yaxshilab tayyorgarlik ko‘rish va Yevropa chempionatida ishtirok etish uchun keldim. Rostini aytganda, men terma jamoa safida faoliyatimni yakunlash haqida o‘ylab ham ko‘rmadim”, – dedi Ibragimovich.
Shvetsiyalik futbolchi 5-iyun, yakshanba kuni Uels terma jamoasiga qarshi o‘rtoqlik o‘yinida ishtirok etishini ta’kidladi. Shuningdek, u Shvetsiya chempionatiga qaytish niyati yo‘q ekanini aytdi.
“Buning menga qizig‘i yo‘q. Shvetsiya chempionati menga to‘g‘ri kelmaydi”, – deya hazil qildi futbolchi.
Qayd etish joiz, Zlatan Ibragimovich 2015/16-yilgi mavsum yakunida Fransiyaning “PSJ” klubini tark etdi. Ayni damda u erkin agent bo‘lib turibdi.
Eslatib o‘tamiz, 2016-yilgi Yevropa chempionati 10-iyundan 10-iyulgacha Fransiyada bo‘lib o‘tadi. “E” guruhidan o‘rin olgan Shvetsiya termasi Belgiya, Italiya va Irlandiyaga qarshi bahs olib boradi.
