O‘zbekiston termasi sardori Odil Ahmedov “Krasnodar” safida jarohat oldi

Futbol bo‘yicha O‘zbekiston milliy terma jamoasi sardori hamda “Krasnodar” klubi yarim himoyachisi Odil Ahmedov “Krilya Sovetov”ga qarshi (3:0) Rossiya chempionati 28-turida jarohat oldi, deb xabar bermoqda “FNK”.

O‘zbekistonlik futbolchi o‘yinning 15-daqiqasida jarohat olib maydonni tark etdi. Uning o‘rniga zaxiradan Yuriy Gazinkiy maydonga tushdi.

“Sonning orqa qismini shikastladim. Jarohat qanchalik og‘ir ekanini bilmayman. Ertaga tibbiy ko‘rikdan o‘taman, lekin jarohat jiddiy emasligini his qiyapman”, – deb ma’lum qildi Ahmedov “Sportbox.ru” muxbiri bilan suhbatda.

Navbatdagi g‘alabadan so‘ng “Krasnodar” ochkolari sonini 53 taga yetkazib, 4-o‘ringa ko‘tarilib oldi. Birinchi o‘rinda borayotgan SSKA hisobida 59, ikkinchi pog‘onadan joy olgan “Zenit”da 55 ochko mavjud. Zaxirasida bitta o‘yinni saqlab turgan “Rostov” 54 ochko bilan kuchli uchlikdan joy egallab turibdi.

Ma’lumot uchun, joriy mavsumda Odil Ahmedov Rossiya chempionatining 27 o‘yinida maydonga tushib, 3 ta gol va 3 ta golli uzatmaga mualliflik qilgan.