Bryussel aeroportida sodir etilgan qo‘poruvchilik harakatlari munosabati bilan Parij, Frankfurt va Amsterdam shaharlari aeroportlarida bojxona nazorati kuchaytirildi. Bu haqda Yevropa matbuotidagi xabarlarga asoslanib, “Interfaks” yozmoqda.
Yevropa Ittifoqiga a’zo davlatlar hukumatlari Bryussel voqealari munosabati bilan favqulodda yig‘ilishlar o‘tkazishi, ularda xavfsizlik choralarini oshirish masalasi ko‘rib chiqilishi aytilmoqda.
Xususan, bir muddat ilgari Buyuk Britaniya bosh vaziri Devid Kemeron hukumatning favqulodda yig‘inini chaqirgani ma’lum bo‘ldi.
Bundan tashqari, Fransiya prezidenti Fransua Olland Yelisey saroyida mamlakat bosh vaziri Manyuel Vals, ichki ishlar vaziri Bernar Kaznyov va mudofaa vaziri Jan-Iv Le Drian bilan favqulodda maslahatlashuvlar o‘tkazishi kutilmoqda.
Shuningdek, Belgiya ichki ishlar vaziri Yan Yambon kun davomida Belgiya xavfsizlik kengashining shoshilinch yig‘ilishi o‘tkazilishini xabar qildi.
22-mart, seshanba kuni mahalliy vaqt bilan 8:00 atrofida Bryusselning “Zaventem” aeroportida ikki portlash yuz berdi, oradan biroz vaqt o‘tib, Bryussel metrosida ham portlash yuz bergani haqida xabar berildi.
Izoh (0)