Namangan viloyati hokimi bokschi Murodjon Ahmadaliyevga Cobalt avtomashinasini topshirdi
Namangan viloyatidagi “Barkamol avlod” bolalar va o‘smirlar sport markazida bokschi Murodjon Ahmadaliyevni taqdirlash marosimi bo‘lib o‘tdi. Bu haqda viloyat hokimligi xabar bermoqda.
Murodjon Ahmadaliyev boks sport turi bo‘yicha 2015-yil Qatar poytaxti Doha shahrida bo‘lib o‘tgan Jahon chempionatida munosib ishtirok etib, kumush medal sohibi bo‘ldi. Eng asosiysi, joriy yilda Braziliyada bo‘lib o‘tadigan Olimpiada o‘yinlariga yo‘llanmani qo‘lga kiritdi.
Yosh avlodni har tomonlama qo‘llab-quvvatlash, munosib rag‘batlantirish maqsadida “Barkamol avlod” bolalar va o‘smirlar sport markazida Murodjon Ahmadaliyevning taqdirlash marosimi bo‘lib o‘tdi. Unda viloyat hokimi Xayrullo Bozorov ishtirok etib, navqiron avlodni sportga yo‘naltirish, bu borada amalga oshirilayotgan ishlarni yanada izchil davom ettirish lozimligini ta’kidladi. Tadbirda viloyat hokimi Cobalt rusumli avtomashinani Murodjon Ahmadaliyevga tantanali ravishda topshirdi.
