Istanbulda Moskva “Lokomotiv”ining futbolchisi Putin surati tushirilgan futbolkada maydonni tark etdi

Moskvaning “Lokomotiv” jamoasi futbolchisi Dmitriy Tarasov Yevropa Ligasining nimchorak finali doirasida “Fenerbaxche”ga qarshi Istanbulda o‘tkazilgan uchrashuv yakunida maydonni Rossiya prezidenti Vladimir Putin surati tushirilgan futbolkada tark etdi, deb xabar bermoqda Meduza sayti.

Uchrashuv yakunlangach, Tarasov jamoa futbolkasini yechgan, shunda uning ostida Putinning harbiy libosda tushgan surati hamda “Eng xushmuomala prezident” yozuvi joylashtirilgan boshqa futbolka borligi ma’lum bo‘lgan.

“U mening prezidentim, – dedi futbolchi ‘R-Sport’ga bergan intervyusida. – Men uni hurmat qilaman va har yerda qo‘llab-quvvatlashga tayyorligimni ko‘rsatmoqchi edim”.

UEFA qoidalari musobaqalar ishtirokchilariga siyosiy bayonotlar berishni taqiqlaydi, shu bois “Lokomotiv”ga nisbatan choralar ko‘rilishi mumkin.