Yevroning Moskva birjasidagi kursi 90 rubldan oshib ketdi
9-fevral, seshanba kuni Moskva birjasidagi kechki savdolar vaqtida yevroning birja kursi 90 rubldan oshdi, deb xabar qiladi “RBK”.
Oxirgi marta rublning yevroga nisbatan bunchalik pasayishi 21-yanvarda qayd etilgandi. O‘shanda birjada bir yevro 93,70 rublgacha chiqib ketgan, ammo kunlik sessiya 89,99 rubllik ko‘rsatkich bilan yopilgan va undan keyin rubl mustahkamlanib borilgandi.
Moskva vaqti bo‘yicha 21:15 (Toshkent vaqti bilan 23:15)da birjada bir yevro 90,2 rublni, bir dollar esa 79,61 rublni tashkil etdi. Amerika valyutasi ham sessiya oxirigacha qimmatlashdi, savdo kuni 78,91 rubllik ko‘rsatkich bilan ochilgandi.
Rublning tushishi neft narxining pasayishi bilan bir vaqtda sodir bo‘ldi. Londondagi savdolarda Brent markasidagi neft narxi bir kun ichida 2,5 dollarga tushdi va Moskva vaqti bilan 21:15 da Brent markasidagi neftning bir barreli 30,50 dollardan savdo qilindi.
