Foto: “Shaftolidek mazali o‘zbek pomidorlari” sabab Moskvagacha borgan “Toshkent haqiqati”
Rossiyalik taniqli blogerlardan biri Ilya Varlamov 17-yanvar, yakshanba (bozor) kuni oddiy moskvaliklar singari bozorga borib, meva-sabzavot sotib oldi va bozordagi narx-navo haqida o‘z blogida axborot berdi.
“Shaftolidek shirin, choy bilan ham ichsa bo‘ladigan o‘zbek pomidorlarining bir kilogrammi — 550 rubl (qariyb 21,5 ming so‘m), O‘zbekistondan olib kelingan limonlarning bir donasi esa 80 rubl (taxminan 3,1 ming so‘m)”, — deb yozadi bloger.
Varlamovning qayd etishicha, bozordagi meva-sabzavotlar sifati bilan yirik supermarketlar tarmog‘idagi shunday mahsulotlarni taqqoslab bo‘lmaydi. Uning so‘zlariga ko‘ra, supermarketda hammasi bir xil ko‘rinishga ega va bir necha oylab saqlab tursa bo‘ladigan meva-sabzavot sotiladi.
“Bunday meva-sabzavotni tabiiy yo‘l bilan yetishtirib bo‘lmaydi. Shu sababli ham do‘konlardan ko‘rinishi chiroyli, lekin bemaza sabzavotlarni sotib olasiz. Bozorlarga esa hammasi, ko‘p yillar avvalgidek, mashinalarda, poyezdlarda, murakkab logistika dasturlarisiz olib kelinadi. Sabzavotga qo‘shib, yoqimli bonus sifatida, ‘Toshkent haqiqati’ni ham olasiz”, — deb yozadi bloger.
