2015-yil 4-dekabr kuni Koreya Xalq-Demokratik Respublikasi (KXDR) dengizda topilgan Janubiy Koreya fuqarosining jasadini Janubiy Koreyaga topshirdi. Bu haqda Milliy birlashma vazirligi vakili Chon Chjun Xi bergan ma’lumotlarga asosan “RIA Novosti” xabar bermoqda.

Ta’kidlanishicha, ikkala koreyalik davlat o‘rtasidagi qurolsizlantirilgan hududdagi Pxanmunjom muzokaralar punktida marhum va uning narsalari topshirilgan.

Agentlik xabar berishicha, marhumning yonidan shaxsini tasdiqlovchi xujjat topilgan va unga ko‘ra marhum Janubiy Koreyaning 32 yoshli fuqarosi bo‘lgan. Uning familiyasi Soy bo‘lib, ismi oshkor qilinmayapti.

Janubiy Koreya hukumati bu shaxsni bedarak yo‘qolganlar ro‘yxatida bo‘lgan-bo‘lmaganligini aniqlashga va uning yaqin qarindoshlarini topishga harakat qilmoqda.