Venesuela prezidenti Nikolas Madura amerikalik hamkasbi Barak Obamani ikki mamlakat o‘rtasidagi munosabatlarni yaxshilash jarayonlariga to‘sqinlik qilishda aybladi, deb xabar beradi “RIA Novosti”.
Venesuela prezidentining aytishicha, uning hukumati Vashingtondan tavsiya etilgan yangi elchi nomzodi bo‘yicha hech qanday javob olmadi. Vaholanki, nomzod tavsiya etilganidan beri bir yarim yildan ko‘proq vaqt o‘tdi.
“Prezident sifatida diplomatik kanallar qidirdim, u yerga elchi jo‘natdim, biroq oradan bir yarim yil o‘tganiga qaramay, Vashington nomzodimizni ma’qullagani yo‘q”, — deya Madura so‘zlaridan iqtibos keltiradi Meksikaning El Universal portali.
2014-yilning fevralida Venesuela 2010-yildan beri bo‘sh turgan AQShdagi elchi lavozimiga Maksimilian Arvelaes nomzodini ko‘rsatgan. O‘sha paytda Venesuela tashqi ishlar vazirligi o‘z qarorini rasmiy Karakasning ochiq va halol diplomatik munosabatlar o‘rnatishga qaratilgan intilishi sifatida baholagandi.
Aslida bu mashmashalar 2010-yilning dekabrida Venesuelaning o‘sha paytdagi prezidenti Ugo Chaves prezident Obama tomonidan elchi etib tayinlangan Larri Palmer nomzodini Venesuelaga nisbatan haqoratomuz so‘zlarni aytganlikda ayblab rad etgandi. Shundan so‘ng AQSh Venesuela elchisi Bernardo Alvares vizasini bekor qilgandi. Oqibatda hanuzgacha ikki mamlakat diplomatik missiyalariga muvaqqat elchilar rahbarlik qilib keladi.
Izoh (0)