Xitoylik kutubxonachi 143 ta rasmni o‘g‘irlagani va qalbakilashtirganini tan oldi
Xitoylik sobiq kutubxonachi Syao Yuan sudda Guanchjou tasviriy san’at akademiyasidan 143 ta rasm o‘g‘irlaganligini tan oldi, deb xabar beradi Associated Press.
Akademiya kutubxonasidagi galereya uchun javobgar bo‘lgan Syao rasmlarni o‘g‘irlab, ularni o‘zi chizgan nusxaga almashtirib qo‘ygan. Kutubxonachining so‘zlariga qaraganda, u birinchi ish kunidayoq galereyadagi rasmlarning ba’zilari qalbaki ekanligini payqagan. Keyinroq u o‘zining qalbaki suratlarini ham kimdir o‘g‘irlab, boshqa nusxaga almashtirib ketayotganligini aniqlagan.
Politsiya jinoyat haqida kutubxonachining hamkasbidan bilib olgan. Suratlarni qalbakilashtiruvchi rassom 2004-yildan 2011-yilgacha 125 ta rasmni kimoshdi savdosida sotib, 34 million yuanni (6 million dollar) qo‘lga kiritgan. Bu pullarga u uy va boshqa rasmlarni sotib olgan.
