Rossiyaning “Glavnaya ssena” teleloyihasida g‘oliblikni qo‘lga kiritgan o‘zbekistonlik qo‘shiqchi Sardor Milano “Uz24.uz” nashriga intervyu berib, hayoti va ijodi bilan bog‘liq turli savollarga javob qaytardi.
“Loyiha haqida eshitishim bilan kastingni o‘tkazib yubormaslikka qaror qildim va bu juda muhim edi. Men kuylayotgan janrim aynan opera emas, bu estradaning opera vokali bilan kuchaytirilgan, yoki aksincha operaning estrada bilan yumshatilgan shakli. Hozirda klassika va zamonaviy musiqa uyg‘unligi butun dunyoda ommalashib bormoqda.
Bolaligim Toshkentda o‘tgan. 178-maktabda, keyin fortepiano bo‘yicha musiqa maktabida tahsil oldim. O‘z ijod yo‘limni boshlagan “Olovuddin” estrada shou studiyasi ham bolaligimning muhim qismi bo‘ldi. Artist bo‘lishimni bolaligimdayoq anglagandim. Klassik musiqaga jiddiy qiziqish esa Olma-otada Chaykovskiy nomidagi kollejning “Klassik fortepiano” bo‘limida o‘qib yurganimda tug‘ildi. Moskvadagi Rossiya musiqa akademiyasidagi tahsil davomida esa operaga qiziqdim.
Taxallusim Milano — buvimning familiyasi Milavanovaning qisqartirilgani, shuningdek La Skala opera teatri joylashgan Milan shahri ham aks etgan.
Rayhon G‘aniyeva, Sardor Rahimxon, Larisa Moskalyova, Rashid Xoliqov, Laylo Galiyeva (“Setora” guruhining ilk tarkibi vakilasi), Shukur (“Fazo” guruhi) kabi o‘zbek estradasining ko‘plab vakillarining qo‘llab-quvvatlash so‘zlari yoqimli bo‘ldi. Toshkentga borgach, ular bilan shaxsan tanishishni istashimni ham aytgandim.
Hozirda mening yuragim bo‘sh. Boshim esa musiqa, karyera va jiddiy rejalar bilan band. Lekin o‘zimga cheklov qo‘ymayman. Agar sevib qolsam, bu faoliyatimga xalal bermaydi.
O‘zbekistonga do‘stlarim, qarindoshlarimni ko‘rishga tez-tez borib turaman. Musiqa materiallari ustida ishlashga ham Toshkent juda tinch va qulay joy. “Glavnaya ssena” loyihasidagi ishtirokimni kuzatib borib, menga muxlislik qilgan butun O‘zbekiston ahlidan minnatodrman. Toshkentda konsert berib, zal yuzida tabassum bilan turgan odamlar bilan to‘lishini, men esa ularga musiqa bayramini ulashishni istayman”, — dedi Sardor.
Izoh (0)