Germaniyaning Bild nashri Fransiyadagi Alp tog‘larida halokatga uchragan Airbus A320 samolyoti “qora quti”sining to‘liq stenogrammasi (shartli belgilar bilan yozilgan matn rasshifrovkasi)ni e’lon qildi, deb yozadi “Gazeta.ru”.
Ta’kidlanishicha, yozuv 1,5 soat davom etadi. Xabar berilishicha, yozuvlarda birinchi uchuvchining kabinaga qulflanib olgan Andreas Lyubitsga “jin urgir eshikni och” deya baqirgani, orqa fonda esa yo‘lovchilarning qichqiriqlari aniq eshitilgan.
Avvalroq Airbus A320 samolyoti ikkinchi uchuvchisiga nisbatan “qasddan qotillik qilish to‘g‘risidagi” ish qo‘zg‘atildi. Marsel prokurori ikkinchi uchuvchi Andreas Lyubits ongli ravishda balandlikni pasaytirganini aytdi. “Uning buni nima sababdan qilgani hozircha bizga ma’lum emas, biz shuni bilamizki, samolyotni u qulatgan”, — deya ta’kidladi Roben.
Eslatib o‘tamiz, 24-mart kuni Barselonadan Dyusseldorfga parvoz qilayotgan Airbus A320 samolyoti Fransiya janubida, Alp tog‘lari ustida halokatga uchrashi oqibatida layner bortida bo‘lgan 150 kishining barchasi halok bo‘lgan edi.
Izoh (0)