21-mart kuni start berilgan o‘zbek blogerlari o‘rtasidagi ikkinchi chempionatga hozirgacha tanlovga 63 ta ariza kelib tushdi, deb xabar bermoqda “Xushnudbek.uz”.
Tanlovga kelib tushayotgan blogpostlar turli mavzuda, turli janrda bo‘lib, ular o‘quvchilarda katta qiziqish uyg‘otmoqda. Blog.telegraf.uz saytida tanlov uchun taqdim etilgan ishlarga hakamlar tomonidan berilgan baholarni o‘sha zahotiyoq ko‘rish imkoniyatining borligi ko‘pchilikda yanada qiziqish uyg‘otmoqda va turnirga o‘zgacha ruh baxsh etyapti.
Yana bir e’tiborli tomoni, saytda blogpostlarga mushtariylar tomonidan ko‘plab fikrlar bildirilmoqda. Hozircha jami izohlar soni 573 tani tashkil qilmoqda. Bu o‘rtacha, har bir blogpostga 9,5 tadan izoh qoldirilgan degani. Shuningdek, saytda blogpostlar reytingi ham mavjud bo‘lib, unda kim yetakchilik qilayotganini ko‘rish mumkin.
Blogerlar chempionati 3 bosqichda o‘tkaziladi va birinchi bosqich uchun arizalar 2-aprel kunigacha qabul qilinadi. Birinchi bosqichda ishtirokchilar soni cheklanmagan bo‘lsa, ikkinchi bosqichda (7−14-aprel) 30 nafar eng yaxshi bloger kuch sinashadi. Final bosqichida esa (19−26-aprel) 10 nafar bloger g‘oliblik uchun kurash olib boradi.
Tanlovda nafaqat blogi borlar, balki blog yuritmaydigan shaxslar ham bemalol ishtirok etishi mumkin. Ular o‘z ishlarini uzblogerlar@gmail.com elektron manziliga yuborishlari mumkin, ularning ishlari Fikr.uz saytida e’lon qilinadi.
Chempionat O‘zbekiston mustaqil bosma ommaviy axborot vositalari va axborot agentliklarini qo‘llab-quvvatlash va rivojlantirish jamoat fondining moliyaviy ko‘magida tashkil qilinayotgan bo‘lib, 1-o‘ringa 4 million so‘m, 2-o‘ringa 2 million so‘m, 3-o‘ringa 1 million so‘m mukofot beriladi.
Shuningdek, qator nominatsiyalar bo‘yicha ham g‘oliblar aniqlanadi, xususan, “Vatanparvalik mavzusida yozilgan eng yaxshi ish” (750 ming so‘m), “O‘zbekistonda yoshlar hayotini yoritgan eng yaxshi bloger” (500 ming so‘m), “Ijtimoiy muammolarni noodatiy tarzda yoritgan bloger” (eng sara badiiy kitoblar to‘plami), “Sog‘lom turmush tarzini targ‘ib qilgan eng yaxshi bloger” (500 ming so‘m), “IT Blog” (3 nafar blogerga 2 yil muddatga 500 mb. xosting ajratadi hamda tanlangan blogerlarga www.index.uz texnoblogida 3 ta tekin PR-maqola joylashtirish huquqi) nominatsiyalari mavjud.
Bundan tashqari, “O‘z ishlarida o‘zbek tilining imlo qoidalariga amal qilgan eng yaxshi bloger” nominatsiyasi ham tashkil qilingan bo‘lib, g‘olibga O‘zbekiston Milliy ensiklopediyalar to‘plami (13 ta tom) taqdim etiladi.
Izoh (0)