Toshkentda diplomatlar o‘rtasida o‘tkazilgan shaxmat turnirida AQSh elchixonasi vakillari g‘olib bo‘ldi

O‘zbekiston Respublikasi Tashqi ishlar vazirligining Qabullar uyida mamlakatimizda akkreditatsiyadan o‘tgan diplomatik korpus va xalqaro tashkilotlar vakillari o‘rtasida shaxmat bo‘yicha XI rapid turnir bo‘lib o‘tdi, deb xabar bermoqda “12news.uz”.

TIV va O‘zbekiston shaxmat federatsiyasi tomonidan o‘tkazilgan musobaqada 27 jamoa, jumladan, Rossiya, Qozog‘iston, Germaniya, AQSh, Tojikiston, Turkmaniston, Chexiya, Eron, Quvayt, Qirg‘iziston, Afg‘oniston, Gruziya, Ozarbayjon, Ruminiya, Falastin elchixonalari, shuningdek “Lukoyl” kompaniyasi, O‘zbekiston TIV, BMT Taraqqiyot dasturi, GIZ jamg‘armasi, Yevropa Ittifoqi vakolatxonalari ishtirok etdi.

Shveysarcha tizimda 7 tur davom etgan musobaqada AQSh elchixonasi vakillari Vyacheslav Troshixin (6,5) va Zujin Garmiz (3,5) umumjamoa hisobida 10 ochko to‘plab, birinchi o‘rinni egalladi. Xuddi shuncha ochko to‘plagan “Lukoyl” vakillari qo‘shimcha ko‘rsatkichlar bo‘yicha ikkinchi, 9 ochko to‘plagan Qozog‘iston elchixonasi vakillari uchinchi o‘rinni egalladi.