Toshkentdagi Alisher Navoiy nomidagi milliy bog‘ va Beshyog‘och maydoni yaqinida qurilayotgan yangi uyda to‘liq Janubiy Koreya texnologiyalaridan foydalanilmoqda, deb yozadi “12news.uz”.

“Narodnoye slovo” gazetasining ma’lumotlariga ko‘ra, Anhor bo‘yida quriladigan uyning fasadi to‘liq oynadan bo‘ladi, bino ichining loyihasi, birinchi va oxirgi qavatlar butunlay boshqacha ko‘rinishda bo‘ladi. Binoning temir-beton karkasi 9 ballik zilizilaga chidamli qilib ishlanadi. Mustahkam poydevor qurilishiga esa bir yil vaqt sarflangan.

Qayd etilishicha, 7 qavatli uy sentabr oyida foydalanishga topshiriladi. Birinchi va ikkinchi qavatlarda ofislar, do‘konlar va fitnes markazi, yuqori etajlarda esa turar-joylar joylashadi. Binoda ikkita katta lift, avtonom isitish tizimi, elektr energiyasidagi uzilish vaqtida ishlatiladigan o‘z generatori bo‘ladi. Eshik qulflari uy egasining barmoq izlarini taniydigan moslama bilan jihozlanadi.

Qurilayotgan uydagi xonadonlarning yarmidan ko‘prog‘i sotib bo‘lingani qayd etilgan. Ushbu uy foydalanishga topshirilgach Anhor bo‘yida xuddi shunday yana 12 ta uy qurilib, yangona infratuzilmaga birlashtirilishi ko‘zda tutilmoqda.