Kastro AQShga ultimatum qo‘ydi — Kuba Guantanamoni qaytarib olmoqchi

Kuba davlat kengashi raisi Raul Kastro AQSh bilan munosabatlar normallashuvi uchun uchta shart bajarilishi kerakligini aytdi, deya xabar bermoqda “Segodnya.ua”. Bular — mamlakatga nisbatan savdo embargosini olib tashlash, Guantanamodagi Amerika harbiy bazasi hududini unga qaytarish va Kubani terrorchilikni qo‘llab-quvvatlovchi mamlakatlar ro‘yxatidan chiqarish.

“Asosiy muammo hal etilmadi. Gap ulkan ijtimoiy va iqtisodiy zarar keltiradigan, shuningdek xalqaro huquq me’yorlariga zid bo‘lgan iqtisodiy, savdo va moliyaviy qamal haqida bormoqda”, — dedi Kastro.

“Diplomatik aloqalarni o‘rnatish — bu ikki tomonlama munosabatlarni normallashtirish bo‘yicha jarayonning boshlanishi, xolos, biroq qamal bor ekan, bu amalga osha olmaydi”, — deya ta’kidladi u.