Ikki marta qamalgan andijonlik amnistiyadan keyin ham Toshkentda 25 ming dollar o‘g‘irlab qo‘lga tushdi
Andijon viloyatida tug‘ilgan kishi 30 yoshga kirmasdan ikkinchi marta Toshkent shahar Yakkasaroy tuman jinoyat ishlari bo‘yicha sudi tomonidan 12 yilga ozodlikdan mahrum etilgan edi, deb xabar bermoqda “Na postu” gazetasi.
To‘rt yil o‘tgach amnistiyaga tushgach, Navoiy viloyatidagi tuman jinoyat ishlari bo‘yicha sudi uning ozodlikdan mahrum qilinish jazosining qolgan muddatini maoshining 30 foizini davlat hisobiga o‘tkazish sharti bilan axloq tuzatish ishlariga almashtirdi. To‘rt farzandning otasi bo‘lgan bu shaxs Andijon shahridagi ko‘p qavatli uylar qurilishiga ishga kirdi. Biroq axloq tuzatish ishlari boshlanganidan bir necha oy o‘tib, ish unga og‘ir va istiqbolsiz tuyulib, kirakashlik qilish uchun tanishidan yengil avtomobilni ijaraga oldi.
Shu tariqa u mijoz olib, Toshkentga keldi. Poytaxtda esa o‘zining eski tanishlaridan ikki nafarini uchratib qoldi. Ular o‘zaro suhbatlashib turib, yaqinda Lacetti va Damas to‘xtaganini, Lacetti egasi Damas’ga ikkita paket uzatganini, keyin esa ikkalasi ham o‘z ishi bilan ketganini ko‘rib qoldi. Paketlarda katta miqdorda pul borligini payqagan eski qadrdonlar Damas’ning orqasidan tushdi.
Avtomobil Chilonzor tumanidagi qahvaxona oldida to‘xtab, uning xo‘jayini ichkariga kirganini ko‘rgan jinoyatchilar Damas’ni ochib, ichidagi pul to‘ldirilgan paketlarni olishdi. Biroq yo‘lda ularning biridagi paket yirtilib, pul sochilib ketdi. Shu paytda qahvaxonadan chiqqan Damas egasi boshqa guvohlar bilan birga uni ushlab qolishga muvaffaq bo‘ldi. Qutilib qolgan ikki sherik esa ikkinchi paketdagi to‘rt million so‘mni teng bo‘lib, qochib ketdi.
Uni izlashlarini bilgan andijonlik erkak uyiga qaytdi va o‘margan pullari hisobiga bir muddat yashadi. Ular tugagach ham ishga joylashmadi, ikkita ishda ishlaydigan xotini hisobiga yashab turdi. Keyin esa yana oson boyish maqsadida poytaxtga yo‘l oldi. Toshkentda bozor yaqinida joylashgan turli viloyatlardan kelgan tadbirkorlar to‘xtagan avtoturargohda kun bo‘yi avtomobillarni kuzatdi.
Nihoyat davlat raqami Qashqadaryo viloyatiga tegishliligini bildirib turuvchi Nexia egasining telefonda kim bilandir katta pul haqida gaplashayotganini eshitib qoldi va xo‘jayin avtombildan uzoqlashgach mashinani ochib, birida 6 ming, birida 19 ming dollar bo‘lgan ikki paketni topdi. 25 ming dollarni cho‘ntakka urib, voqea joyidan g‘oyib bo‘ladi.
Tabiiyki, jabrlanuvchi voqea yuzasidan huquqni muhofaza qiluvchi organlarga murojaat qildi. Ichki ishlar xodimlari tez orada ushbu jinoyatni ochishga muvaffaq bo‘ldi. Tergov jarayonida jinoyatchi va uning sheriklarining boshqa qilmishlari ham oshkor bo‘ldi. Bu qilmishlar uchun ular qonun oldida javob berdilar.
