AQShda Kim Chen Inning o‘limi haqidagi film premyerasi terakt xavfi tufayli bekor qilindi
AQShning Nyu-York shahrida Shimoliy Koreya yetakchisi Kim Chen Inning qatl etilishi haqida hikoya qiluvchi “Intervyu” filmi premyerasi bekor qilindi, deya xabar bermoqda Variety. Nashrning aniqlik kiritishicha, bunday qaror xakerlarning namoyish vaqtida terakt uyushtirish haqidagi tahdidlari tufayli qabul qilindi. Premyera 2014-yil 18-dekabr kuni Sunshine Cinema kinoteatrida bo‘lib o‘tishi kerak edi.
Kartinada bosh rollarni ijro etgan Jeyms Franko va Set Rogen o‘tgan hafta filmning Los-Anjelesdagi premyerasiga tashrif buyurdi va tadbir tinch o‘tganini ta’kidladi. Shunga qaramay, Amerikadagi kinoteatr tarmoqlarining ba’zilari “Intervyu”ni namoyish etishdan bosh tortmoqda.
Eslatib o‘tamiz, ushbu filmdan olingan Kim Chen In o‘limi aks etgan lavha 15-dekabr kuni internetda paydo bo‘ldi. Ertasi kuni anonim xakerlar Sony Pictures kompaniyasiga murojaat yuborib, premyera vaqtida terakt uyushtirish haqida tahdid etdi.
