Daniya va uning muxtoriyati Grenlandiya Dengiz tubi bo‘yicha BMT komissiyasiga o‘zining Arktikadagi hududiy huquqlarini kengaytirishni so‘rab murojaat qildi. Shu tariqa, Daniya mamlakatlardan birinchi bo‘lib Shimoliy qutbga bo‘lgan huquqini talab qildi hamda bu borada Rossiya va Kanadani ortda qoldirdi, deb yozadi Interfax.
Daniya tashqi ishlar vaziri Martin Lidegorning aytishicha, ilmiy ma’lumotlar Grenlandiya kontinental shelfi Arktika okeani tubidagi tuzilmalar bilan to‘g‘ridan-to‘g‘ri bog‘liqligini ko‘rsatadi. Bu esa mamlakatga Grenlandiya sohillaridan shimol tomonga qarab 900 ming kvadrat kilometr uchun da’vogarlik qilishga imkon beradi.
Ta’kidlash joiz, Rossiya va Kanada ham Arktikadagi chegaralarini kengaytirish bo‘yicha BMT komissiyasiga 2015-yilda ariza bermoqchi edi.
Financial Times yozishicha, Kopengagen tomonidan amalga oshirilgan bunday tadbir uning Rossiya, Kanada va AQSh bilan munosabatlariga putur yetkazishi mumkin. Ekspertlar Arktikaning tinch yo‘l bilan o‘zlashtirilishi yakunlangani, endi tanglik faqat o‘sib borishidan xavfsiramoqda.
Izoh (0)