Qashqadaryo viloyatida qarindoshlarining pullari va hujjatlari saqlanadigan seyfni o‘g‘irlab, somonxonaga yashirgan jinoyatchilar qo‘lga olindi, deb xabar bermoqda “Huquq” gazetasi.
O‘g‘rilik sodir bo‘lgan kuni xonadon egasi Elmira Norqulova mehmondorchilikdan qaytgach darvozani ichkaridan berkitib qo‘yilganini ko‘rib uyga o‘g‘ri tushganini tushundi. Ma’lum bo‘lishicha, o‘g‘ri hovlining o‘ng tomonidagi uyning derazasini yechib olib, ichkariga kirgan va xonadagi javon yonida turgan temir seyfni olib ketgan ekan.
O‘g‘ri yoki o‘g‘rilar 800 ming so‘m pul, 300 AQSh dollari, Nokia rusumli qo‘l telefoni va boshqa mayda-chuydalarni o‘g‘irlab ketgan edi. Seyf ichida uyining kadastr hujjatlari, fuqarolik pasporti va nikoh hamda haydovchilik guvohnomalari, shuningdek, boshqa narsalar ham bor edi.
O‘tkazilgan surishtiruvlar natijasida o‘g‘rilik xonadon egasiing qarindoshlari tomonidan sodir etilgani ma’lum bo‘ldi. O‘g‘rilikda gumon qilinganlardan biri sudda aybiga qisman iqrorlik bildirdi va quyidagicha ko‘rsatma berdi. Uning bildirgisiga qaraganda, o‘sha kuni kechki payt ular ko‘chaga “o‘ynagani” chiqadilar. Pullari yo‘qligi sababli Shohruh o‘g‘irlik qilishni taklif etadi. Shunda Sanjar amakisining uyiga o‘g‘irlikka tushish taklifini bildiradi. Ular aytilgan manzilga boradilar.
“Men ko‘chada kuzatuvda qoldim, ular uchalasi devordan oshib, hovliga tushishdi. Ko‘p o‘tmay Shohro‘z ortiga qaytdi. Sanjar bilan Shohruh hovlidan seyfni olib chiqishdi va uyimga olib kelishdi. Men esa biror kishi kelib qolmasin, deb yana ko‘chaga qorovullikka chiqdim. Birozdan keyin uyga kirsam, seyf ichidan uyning kadastr hujjatlari, fuqarolik pasporti, nikoh guvohnomasi, haydovchilik guvohnomasi, talonlar, tibbiyot xaritasi, pensiya daftarchasi, payvandchilik diplomi, tug‘ilganlik to‘g‘risidagi guvohnomalar pechkada yonayotganini ko‘rdim”, − dedi u.
Jinoyat ishlari bo‘yicha Nishon tuman sudi sudlanuvchilarga qilmishlariga yarasha tegishli jazo tayinlandi. Shunday qilib, somonxonadagi somon uyumlari tagiga ko‘mib qo‘yilgan temir seyf topildi va egasiga qaytarildi. Albatta, sud hukmiga ko‘ra, jabrlanuvchi Elmira Norqulovaga yetkazilgan zararni qoplash uchun sudlanuvchilarning yaqinlari tomonidan 2 mln. 800 ming so‘m to‘landi.