O‘zbekiston Axborot-kommunikatsiya texnologiyalari taraqqiyoti indeksida 115-o‘rinni egalladi
Xalqaro elektr aloqasi ittifoqi 24-noyabr kuni an’anaviy “Axborot jamoatchiligini o‘lchash” (Measuring the Information Society Report) hisobotini taqdim etdi, deb yozadi “Gazeta.uz”. AKT (axborot-kommunikatsiya texnologiyalari) taraqqiyoti indeksi (ICT Development Index, IDI)uning muhim qismidir.
2013-yil yakunlariga ko‘ra, IDI bo‘yicha birinchi o‘rinni Daniya egalladi. Koreya Respublikasi undan keyingi pog‘onada joylashdi.
O‘zbekiston AKT taraqqiyoti indeksida 3,40 ko‘rsatkich (eng yuqori ko‘rsatkich — 10) bilan 115-o‘rinni band etdi. 2012-yilda esa ushbu ko‘rsatkich 3,27 ga teng bo‘lib, 116-o‘ringa munosib ko‘rilgan edi.
AKT taraqqiyot indeksi 166 davlatni o‘z ichiga oladi va AKTdan foydalanish imkoniyati, ular bilan ishlash malakalari darajasi kabi ko‘rsatkichlar bo‘yicha tuziladi.
Yevropa AKT taraqqiyot indeksida 7,14 ball bilan yetakchilik qilmoqda. Undan keyingi o‘rinlarni esa MDH (5,33), Shimoliy va Janubiy Amerika (4,86), Osiyo-Tinch okeani mintaqasi (4,57), Arab davlatlari (4,55) va Afrika (2,31) band qildi.
