Toshkentda elektr tarmog‘idagi tez-tez uzilishlar isitish vositalari ko‘p ishlatilayotgani sababli bo‘layotgani ma’lum qilindi
Toshkent shahridagi elektr tarmog‘ida tez-tez kuzatilayotgan uzilishlarga aholi tomonidan ko‘plab isitish vositalarining yoqilishi oqibatida yuklamaning ortib ketishi sabab bo‘lmoqda. Bu haqda “O‘zbekenergo” DAKning “Toshkent shahar elektr tarmoqlari korxonasi” aksiyadorlik jamiyatining rasmiy xatiga asoslanib “Uz24.uz” xabar berdi.
Qayd etilishicha, havo haroratining pasayishi bilan aholi tomonidan elektr isitish vositalari, ko‘pincha qo‘lbola qurilmalar va isitish rejimida konditsionerlarning ishlatilishi ko‘payib ketgan. Yuklamaning ortishi elektr ishlab chiqaruvchi stansiyalar faoliyatining muvozanati buzilishiga olib keladi.
Bunday holatda Milliy dispetcherlik markazi elektr iste’molini cheklash va liniyalarni bosqichma-bosqich o‘chirishga ko‘rsatma beradi. Uzilishlardan aholining xabardor qilinmayotganiga esa elektr iste’moli cheklovlari tezkor ravishda kiritilayotgani sabab bo‘layotgani aytilgan.
Bu majburiy chora ekanligi va energotizimning barqaror ishlashi uchun qo‘llanayotgani ta’kidlangan. Aks holda, avariyaga qarshi tizim ishlab ketib, avtomatik ravishda elektr uzilishiga olib kelishi mumkinligi aytilgan.
