AQSh Milliy xavfsizlik agentligining sobiq xodimi Edvard Snouden davlatlar tomonidan jamiyatni ommaviy ravishda kuzatilishi muammosi bo‘yicha o‘z fikrlarini bildirdi, deb xabar bermoqda “RIA Novosti”.

Jurnalistlar xalqaro federatsiyasining iltimosi bilan qilgan videomurojaatida Snouden inson huquqlari buzilishining yangi to‘lqini nafaqat bunda ayblanadigan davlatlarda, balki demokratik davlatlarda ham kuzatilayotganini, yaqin o‘tmishda texnologik sabablar tufayli imkonsiz bo‘lgan ommaviy ravishda kuzatish bugungi kunda keng qo‘llanilayotganini aytib o‘tgan.

Shuningdek, uning o‘zi 2013-yilda AQSh va Buyuk Britaniya maxsus xizmatlari tomonidan ommaviy kuzatish olib borilishi haqidagi maxfiy ma’lumotlarni oshkor qilganidan keyin ham bu ishlar to‘xtamaganini alohida ta’kidlagan. Snoudennig so‘zlariga ko‘ra, hukumatlar tomonidan doimiy ravishda kuzatuvlarni to‘xtatish lozimligi aytib kelinishiga qaramay, bu so‘zlar amalda hech qanday ahamiyatga ega emas.