“Amerika xonimi” va “Dunyo xonimi — Rossiya” tanlovlarining birgalikdagi final bosqichi Qrimdagi suv ustida qurilgan maydonchada o‘tkaziladi. Bu haqda tanlov tashkilotchilaridan biri va hakamlar hay’ati a’zosi Aleksey Kuznetsov ma’lumotiga tayanib, “ITAR-TASS” xabar bermoqda.

“Ayni damda biz bir qator maydonchalar ustida ish olib bormoqdamiz. Tanlovlarning dastlabki bosqichlari ikki hafta davomida Qrim bo‘ylab turli joylarda, xususan, mintaqaning tarixiy merosini ta’kidlash maqsadida qadimgi Xersones shahridagi antik teatrda o‘tkaziladi. Biroq final bo‘lib o‘tadigan joyni sir saqlamoqchimiz. Faqat bir narsani ayta olamizki, maydoncha barchani, ayniqsa, amerikalik do‘stlarimizni hayron qoldiradi. U suv ustida bo‘ladi”, — dedi Kuznetsov.

Shuningdek, u hamkorlikda o‘tkazilayotgan tanlovlarni tashkillashtirish bo‘yicha qo‘mitaga Sevastopol gubernatori vazifalarini bajaruvchi Sergey Menyaylo rahbarlik qilishini ma’lum qildi.

Tashkilotchilar ayni damda 19-noyabr kuni Amerikaning Merilend shtatida bo‘lib o‘tadigan “Dunyo xonimi — 2014” go‘zallik tanlovi finalida Rossiyadan ikki ishtirokchi qatnashishi imkoniyatini muhokama qilmoqda: “biri Rossiya xonimi sifatida, ikkinchisi Sevastopolni himoya qilib. Hozircha biz ularning ismini bilmaymiz. Hozir da’vogarlar saralash bosqichidan o‘tmoqda. Qaror yaqin kunlarda rasman e’lon qilinadi”, — dedi Kuznetsov.