Toshkentda “Yilning eng faol yosh o‘qituvchisi” tanlovining mamlakat bosqichi uyushtirildi. Unda 14 nafar yosh o‘qituvchining innovatsion g‘oya, loyiha va texnologiyalarini amaliyotga tatbiq etish, dars jarayonida o‘quvchilarga mavzuga doir tushunchalarni yetkazish mahorati hamda ilg‘or pedagogik va axborot-kommunikatsiya texnologiyalaridan foydalanish ko‘nikmasi sinovdan o‘tkazildi, deya xabar beradi O‘zA.

Tanlov natijalariga ko‘ra, Qashqadaryo viloyati Muborak tumanidagi Muborak ijtimoiy-iqtisodiyot kolleji o‘qituvchisi Nodira Umirova birinchi, Buxoro muhandislik texnologiya instituti qoshidagi 1-akademik litseyi o‘qituvchisi Feruza Jumayeva ikkinchi, Navoiy davlat konchilik instituti qoshidagi 2-akademik litseyi o‘qituvchisi O‘ktam Mardonov uchinchi o‘ringa sazovor bo‘ldi.

G‘oliblar O‘zbekiston Kasaba uyushmalari federatsiyasi kengashi tomonidan O‘zbekiston mustaqilligining 23-yilligi oldidan tashkil etiladigan “Yosh mutaxassislar” respublika forumida ishtirok etish yo‘llanmasini qo‘lga kiritdi. Shuningdek, “Eng zukko o‘qituvchi”, “Eng ma’naviy barkamol o‘qituvchi”, “Eng zakovatli o‘qituvchi”, “Eng pedagogik mahoratli o‘qituvchi” kabi 11 ta nominatsiya bo‘yicha ham faol yosh mutaxassislar aniqlandi.