Afg‘onistonning sobiq tashqi ishlar vaziri Abdullo Abdullo prezidentlik saylovlarining ikkinchi bosqichida g‘alaba qozonganini e’lon qildi, deya xabar beradi “ITAR-TASS” AFP agentligi axborotiga asoslanib.

Qobul ko‘chalariga chiqqan Abdullo Abdulloning minglab tarafdorlari ikkinchi bosqich natijalaridan norozi ekanligini bildirmoqda. Sobiq tashqi ishlar vazirining o‘zi esa prezident Hamid Karzayni Ahmadzay foydasiga natijalarni o‘zgartirganlikda ayblab, buni “hukumatni egallab olish” deb atadi.

7-iyul kuni Afg‘onistonning Mustaqil tanlov komissiyasi e’lon qilgan dastlabki natijalarga ko‘ra, Abdullo Abdullo 43,56 foiz ovoz to‘pladi; Ashraf G‘ani Ahmadzay esa 56,44 foiz ovoz bilan g‘olib bo‘ldi.

So‘nggi, hal qiluvchi natijalar 22-iyul kuni e’lon qilinishi, yangi prezidentning inauguratsiyasi esa 2-avgust kuni o‘tkazilishi rejalashtirmoqda.

Eslatib o‘tamiz, Afg‘onistonda prezidentlik saylovlarining ikkinchi turi 14-iyun kuni yakuniga yetdi.

Abdullo Abdullo ikkinchi bosqich yakunlanishi bilanoq ovoz berish natijalarini tan olmasligini, Mustaqil tanlov komissiyasining barcha harakatlari noqonuniy ekanligini aytgan. U tanlov vaqtida bir necha qoidalarning buzilgani va Ahmadzay tanlov komissiyasi tomonidan qo‘llab-quvvatlangani uchun norozilik bildirdi.