Sevara Nazarxon “Toch v toch” finalida Meri Poppins qiyofasida sahnaga chiqdi
8-iyun, yakshanba kuni Rossiya Birinchi kanalida “Toch v toch” (“Xuddi o‘zginasi”) shousining final bosqichi bo‘lib o‘tdi. Shouda O‘zbekistonda xizmat ko‘rsatgan artist Sevara Nazarxon Meri Poppins qiyofasida sahnaga chiqdi. Bu haqda Uz24 xabar berdi.
Sevara “Meri Poppins, ko‘rishguncha!” filmidagi “Mukammal xonim” qo‘shig‘ini ijro etdi. Bu qo‘shiqni Tatyana Voronina film uchun kuylagan bo‘lib, kinoda Meri Poppins obrazini Natalya Andreychenko yaratgan.
Hakamlar hay’ati a’zolari hamda betaraf hakam o‘zbek xonandasining chiqishini 23 ballga baholadi.
Shunday qilib, Sevara Nazarxon Rossiya Birinchi kanalining yana bir shousidagi ishtirokini yakunladi. Afsuski, Sevara sovrinli o‘rinni egallay olmadi, deyiladi xabarda.
Birinchi o‘rinni shouning ikki qatnashchisi: Nikita Presnyakov va Irina Dubsova band etdi.
