Braziliyadagi suv toshqinlari natijasida o‘n minglab odamlar jabr ko‘rdi

Braziliyaning Parana shtatida kuzatilgan suv toshqinlari natijasida to‘qqiz kishi halok bo‘ldi, deya xabar berdi El Nacional nashri.

Mahalliy nashrning qayd etishicha, Parana shtati poytaxti Kuritibada uch kundan so‘ng start oladigan futbol bo‘yicha jahon chempionati uchrashuvlariga mezbonlik qiladi.

Parana hukumatining ma’lum qilishicha, suv toshqinlari natijasida asosan shtatning markaziy qismida istiqomat qiluvchi 48 ming kishi jabr ko‘rgan. Kuritibada ham kuchli yog‘ingarchilik kuzatilgan, biroq buning natijasida shaharda jiddiy talofatlar ro‘y bermagan.

Shtat gubernatori Beto Richaning ma’lum qilishicha, tabiiy ofat natijasida 70 ta munitsipalitet zarar ko‘rgan. Hukumat ushbu hududlarda favqulodda holat e’lon qilishni rejalashtirmoqda. Sinoptiklar esa yomg‘irlar faqat dushanba kuni to‘xtashi mumkinligini ma’lum qilgan edi, deb yozadi “Kun”.

Kuritiba shahrida futbol bo‘yicha JCh—2014 uchrashuvlarini qabul qiluvchi “Arena Bayshada” stadioni joylashgan. 16-iyun kuni bu yerda Nigeriya—Eron, 23-iyun kuni Ispaniya—Avstraliya, 26-iyun kuni esa Rossiya—Jazoir uchrashuvlari bo‘lib o‘tadi.